سعودی گروپ انویسٹمنٹ نے شیل پاکستان کے 77.42 فیصد شیئرز خریدے

نیوز ٹوڈے :   سعودی گروپ اسد ہولڈنگ نے UAE میں قائم وافی انرجی ہولڈنگ لمیٹڈ کے ذریعے شیل پاکستان لمیٹڈ کا 77.42 فیصد شیئر ہولڈنگ اور کنٹرول حاصل کیا۔شیل پاکستان لمیٹڈ پاکستان اسٹاک ایکسچینج میں درج ہے اور پاکستان میں موٹر فیول اور لبریکینٹس کی خوردہ فراہمی میں مصروف ہے۔ Wafi Energy LLC نے سرمایہ کاری کے مقاصد کے لیے پاکستان میں ایک ہولڈنگ لمیٹڈ قائم کی ہے۔مسابقتی کمیشن نے ان حصص کی خریداری کی منظوری بھی دی۔

مسابقتی کمیشن کی طرف سے جاری کردہ بیان کے مطابق شیل پاکستان کے تینوں متعلقہ مارکیٹوں میں الگ الگ حصص ہیں تاہم مجوزہ لین دین کے بعد ان مارکیٹوں میں کوئی تبدیلی نہیں آئے گی اور نہ ہی وافی انرجی ہولڈنگ لمیٹڈ متعلقہ مارکیٹوں میں غالب ہو گی۔

چیئرمین مسابقتی کمیشن ڈاکٹر کبیر احمد سدھو نے کہا کہ اس پیشرفت سے توقع ہے کہ ریٹیل فیول سپلائی چین میں خدمات کے معیار اور مسابقت کو فروغ ملے گا اور پاکستانی منڈیوں کو پھلنے پھولنے میں مدد ملے گی۔

دوسری جانب شیل پاکستان کے ترجمان کے مطابق فروخت کا عمل ایک سال سے جاری ہے اور اسے مکمل ہونے میں مزید 2 ماہ لگ سکتے ہیں۔ترجمان نے کہا کہ لبریکینٹ کے کاروبار کے شیئرز بھی فروخت کیے جا رہے ہیں، شیل برانڈ برقرار رہے گا۔