پاکستان کے پاس معاشی اصلاحات کے علاوہ کوئی چارہ نہیں: محمد اورنگزیب

نیوز ٹوڈے :   وفاقی وزیر خزانہ محمد اورنگزیب نے کہا ہے کہ پاکستان کے پاس معاشی اصلاحات کے نفاذ کے بغیر کوئی چارہ نہیں۔واشنگٹن میں ڈائریکٹر آئی ایم ایف سے گفتگو کرتے ہوئے وزیر خزانہ نے کہا کہ ٹیکس نادہندگان کو ٹیکس نیٹ میں لایا جائے گا۔

انہوں نے کہا کہ پنشن کی ذمہ داری پاکستان کا بڑا مسئلہ ہے، وفاقی حکومت کے اخراجات کی رقم بھی کم کی جا رہی ہے، امداد کے بجائے سرمایہ کاری پر انحصار کرنا چاہتے ہیں، خسارے میں چلنے والے اداروں کی نجکاری کی جائے گی۔

واشنگٹن میں جی 24 وزارتی اجلاس سے خطاب کرتے ہوئے وزیر خزانہ نے کہا کہ ترقی پذیر ممالک پر قرضوں کے زیادہ بوجھ کے مسئلے کو حل کرنے کی ضرورت ہے۔ پاکستان سمیت ترقی پذیر ممالک کو درپیش ماحولیاتی تبدیلیوں پر مل کر کام کریں۔

واشنگٹن میں آئی ایم ایف اور ورلڈ بینک کے سالانہ اجلاسوں میں شرکت کے موقع پر وزیر خزانہ نے سعودی ہم منصب سے بھی ملاقات کی۔ملاقات میں دوطرفہ تجارت بڑھانے، اہم شعبوں میں سرمایہ کاری کو آسان بنانے اور باہمی دلچسپی کے شعبوں میں تعاون بڑھانے پر بھی اتفاق کیا گیا۔

وزیر خزانہ محمد اورنگزیب نے سٹی بینک کے وفد سے بھی ملاقات کی۔ ملاقات میں توانائی، پنشن اور حکومتی رائٹ سائزنگ کے شعبوں میں اصلاحات پر تبادلہ خیال کیا گیا۔واضح رہے کہ وزیر خزانہ کی قیادت میں پاکستانی وفد واشنگٹن میں موجود ہے، بین الاقوامی کیپٹل مارکیٹوں تک رسائی حکومت کے ایجنڈے میں شامل ہے۔