لاہور قلندرز کی ٹیم گیانا میں ہونے والی گلوبل سپر لیگ میں شرکت کرے گی

نیوز ٹوڈے :     گیانا میں ہونے والی گلوبل سپر لیگ میں لاہور قلندرز کی ٹیم شرکت کرے گی، لیگ میں پانچ ٹیمیں شرکت کریں گی۔ جی ایس ایل ٹی ٹوئنٹی 20 کے شیڈول کا بھی اعلان کر دیا گیا ہے۔لاہور قلندرز کی انتظامیہ کا کہنا ہے کہ گیانا میں گلوبل سپر لیگ کا حصہ بننے پر پرجوش ہیں، لاہور قلندرز واحد ٹیم ہے جو ایس ایل ٹی ٹوئنٹی 20 میں پاکستان کی نمائندگی کرے گی۔

 جی ایس ایل ٹی ٹوئنٹی کے پہلے ایڈیشن میں 5 ٹیمیں شرکت کریں گی جن میں لاہور قلندرز، انگلینڈ کی ہیمپشائر ہاکس، ویسٹ انڈیز کی گیانا ایمیزون واریئرز، بنگلہ دیش کی رنگ پور رائیڈرز اور آسٹریلیا کی وکٹوریہ شامل ہیں۔ جی ایس ایل ٹی ٹوئنٹی 26 نومبر سے 7 دسمبر تک کھیلی جائے گی، 11 میچز کے شیڈول کا اعلان بھی کر دیا گیا ہے۔

جی ایس ایل ٹی ٹوئنٹی کی انعامی رقم 1 ملین امریکی ڈالر مقرر کی گئی ہے۔جی ایس ایل کے چیئرمین کلائیو لائیڈ نے کہا، "ہم تمام ٹیموں کو خوش آمدید کہنے کے منتظر ہیں۔ ہمیں یقین ہے کہ جی ایس ایل ٹی ٹوئنٹی 20 ایکشن سے بھرپور ہوگا۔ پانچوں ٹیموں کے دنیا بھر میں مداح ہیں۔

لاہور قلندرز کے مالک سمین رانا نے کہا، "ہم GSL گیانا میں اپنی شرکت کا اعلان کرتے ہوئے بہت پرجوش ہیں، GSL دنیا کی پانچ بہترین ٹیموں کو اکٹھا کر رہا ہے جہاں زبردست مقابلہ ہوگا۔سمین رانا نے کہا کہ یہ پلیئرز ڈویلپمنٹ پروگرام کے ٹیلنٹ کی مہارت کو جانچنے کے لیے ایک اچھا پلیٹ فارم ہے، ہمارے نوجوان کھلاڑی اس پلیٹ فارم پر شاندار پرفارمنس دکھانے کے لیے کوشاں ہیں۔