برطانوی وزیراعظم نے حکومتی پیش رفت کے تعین کے لیے چھ اہداف مقرر کیے

نیوز ٹوڈے :    برطانوی وزیر اعظم سر کیر سٹارمر نے حکومتی پیش رفت کا تعین کرنے کے لیے چھ اہداف مقرر کیے ہیں۔الیکشن جیتنے اور وزارت عظمیٰ کا عہدہ سنبھالنے کے پانچ ماہ بعد کیئر اسٹارمر نے اپنی حکومت کے لیے واضح اہداف مقرر کیے ہیں جن کے مطابق انھیں یقین ہے کہ ووٹرز ان اہداف کی بنیاد پر ان کی حکومت کی کارکردگی اور کامیابی کا اندازہ لگا سکیں گے۔

برطانوی میڈیا رپورٹس کے مطابق وزیراعظم کیئر اسٹارمر نے کہا کہ وہ اپنے ووٹرز سے کیے گئے وعدوں کے تحت شہریوں کا معیار زندگی بہتر بنانے کے لیے اقدامات شروع کر رہے ہیں۔برطانوی وزیراعظم کی جانب سے اعلان کردہ اہداف کے تحت انگلینڈ میں اگلے پانچ سالوں میں 15 لاکھ نئے گھر تعمیر کیے جائیں گے اور کم از کم 150 بڑے اقتصادی منصوبوں کو تیز کرنے کی اجازت دی جائے گی۔

وزیراعظم نے کہا کہ انگلینڈ میں نیشنل ہیلتھ سروس کے مریض علاج کے لیے 18 ہفتوں سے زیادہ انتظار نہیں کریں گے۔وزیر اعظم کے اہداف میں سڑکوں کو محفوظ بنانے کے لیے انگلینڈ اور ویلز میں 13000 اضافی پولیس افسران، PCSOs اور خصوصی کانسٹیبلوں کی بھرتی شامل ہے۔وزیر اعظم نے نقل مکانی کو کم کرنا اپنا مشن بنایا ہے لیکن اہداف مقرر کرنے سے گریز کیا ہے۔

رپورٹ کے مطابق سٹارمر کا اہداف کا تعین درحقیقت برطانیہ کے اگلے عام انتخابات تک ووٹرز کی حمایت کو برقرار رکھنے کا اقدام ہے، تاہم سٹارمر کے حکومتی عہدیداروں نے ترقی کے اہداف کو اگلے انتخابات کی تیاریوں سے جوڑنے والی رپورٹس کو مسترد کر دیا ہے۔

سٹارمر حکومتی عہدیداروں نے کہا کہ وزیر اعظم کی طرف سے اعلان کردہ ترقی کے اہداف اگلے الیکشن میں جیت کی تیاری نہیں بلکہ گزشتہ سالوں میں اٹھائے گئے غلط اقدامات کو درست کرنے کی کوشش ہے اور برطانوی ووٹرز ناقابل اعتبار سیاست کے تجربے سے گزرنے کے بعد اس بات کو بہتر طور پر سمجھتے ہیں۔

دوسری جانب اپوزیشن کنزرویٹو پارٹی کے رہنماؤں نے وزیراعظم کیئر اسٹارمر کی جانب سے اعلان کردہ اہداف پر تنقید کرتے ہوئے اسے لیبر پارٹی کی مایوسی کی علامت قرار دیا۔کنزرویٹو رہنما ایلکس برگھارٹ نے ایک بیان میں کہا کہ لیبر پارٹی کے حالیہ اعلانات ایک اور اشارہ ہیں کہ ان کی گاڑی سڑک سے ہٹ رہی ہے۔