امریکی پابندیوں کا کوئی جواز نہیں، ایٹمی پروگرام پر کوئی سمجھوتہ نہیں ہوگا، وزیراعظم

نیوز ٹوڈے :   وزیراعظم شہباز شریف نے کہا ہے کہ امریکا کی جانب سے ہم پر عائد پابندیوں کا کوئی جواز نہیں اور پاکستان کے ایٹمی پروگرام پر کوئی سمجھوتہ نہیں کیا جائے گا۔

وفاقی کابینہ کے اجلاس سے خطاب کرتے ہوئے وزیراعظم شہباز شریف نے کہا کہ چند روز قبل خوارج کے حملے میں 17 سیکیورٹی اہلکار شہید ہوئے اور ہماری فورسز نے کئی خوارج کو ہلاک کیا، فوجی سربراہ نے خود جا کر اہلکاروں کی حوصلہ افزائی کی، تمام وسائل بروئے کار لائے جارہے ہیں۔ دہشت گردی کے خاتمے کے لیے بھرپور جنگ لڑی جا رہی ہے، جب تک دہشت گردی کا سر نہیں کچلا جاتا چین سے نہیں بیٹھیں گے۔

انہوں نے کہا کہ خیبرپختونخوا اور بلوچستان میں دہشت گردی کے واقعات ہوئے، خیبرپختونخوا میں فرقہ واریت کا واقعہ انتہائی افسوسناک ہے، دونوں گروپ مسلح ہیں، جب کرم میں یہ قتل و غارت گری ہو رہی تھی، اسلام آباد پر حملہ کیا جا رہا تھا۔

شہباز شریف نے کہا کہ دہشت گردی کے خلاف جنگ میں سیکیورٹی فورسز کے ساتھ ہیں، حکومت صوبوں کے ساتھ مل کر دہشت گردی کے خلاف اقدامات کر رہی ہے۔

بیلسٹک میزائل پروگرام کے حوالے سے امریکا کی جانب سے لگائی جانے والی پابندیوں پر وزیراعظم شہباز شریف نے کہا کہ ہم پر لگائی گئی پابندیاں بلاجواز ہیں، پاکستان کا ایٹمی پروگرام صرف ملکی دفاع کے لیے ہے اور یہ 240 ملین عوام کا پروگرام ہے، وہاں موجود ہوں گے۔ پاکستان کے ایٹمی پروگرام پر کوئی سمجھوتہ نہیں کیا جائے گا۔

شہباز شریف نے کہا کہ گزشتہ روز پی ٹی آئی سے کمیٹی کا اجلاس ہوا، قومی مفاد کو سامنے رکھ کر بات ہوئی تو اتحاد کو فروغ ملے گا، کسی کی نیت پر کوئی شک نہیں، امید ہے دونوں کمیٹیاں ایسا حل نکالیں گی جس سے عوام کو فائدہ ہو گا۔ 

وزیراعظم نے مزید کہا کہ مہنگائی 2018 کے بعد کم ترین سطح پر ہے، برآمدات بڑھ رہی ہیں، قاہرہ میں ڈاکٹر یونس سے مثبت بات چیت ہوئی، بنگلہ دیش کے ساتھ تعلقات قائم ہو رہے ہیں اور ہمارا چاول بنگلہ دیش کو برآمد کیا جا رہا ہے۔