طیارہ حادثے پر پیوٹن کی معافی کے بعد آذر بائیجان کے صدر کا سخت ردعمل

نیوز ٹوڈے :  آذربائیجان کے صدر الہام علییف نے قازقستان میں طیارے کے حادثے پر اپنے روسی ہم منصب کی معافی پر ردعمل ظاہر کرتے ہوئے کہا کہ ہم نے روسی حکام کی جانب سے طیارہ حادثے میں حقائق چھپانے کی واضح کوششیں دیکھی ہیں۔

غیر ملکی میڈیا کے مطابق 25 دسمبر کو قازقستان میں گر کر تباہ ہونے والے آذربائیجانی مسافر طیارے کے معاملے پر آذربائیجان کے صدر الہام علیوف نے کہا کہ طیارہ روسی حملے کا نشانہ تھا۔

روسی صدر پیوٹن کی جانب سے حادثے پر معافی مانگنے پر صدر الہام علیوف کا کہنا تھا کہ ہمارا طیارہ حادثاتی طور پر مار گرایا گیا، لیکن بدقسمتی سے ہم نے طیارہ حادثے کی حقیقت چھپانے کی واضح کوششیں دیکھیں اور پہلے 3 دن تک صرف روس سے مضحکہ خیز باتیں ہی سنیں۔ .

واضح رہے کہ 25 دسمبر کو آذربائیجان کا مسافر طیارہ قازقستان کے شہر اکتاؤ کے قریب گر کر تباہ ہو گیا تھا جس کے نتیجے میں 38 افراد ہلاک اور 29 زخمی ہو گئے تھے۔

حادثے کے تین دن بعد روسی صدر ولادیمیر پیوٹن نے آذربائیجان کے صدر الہام علییف سے معافی مانگتے ہوئے اعتراف کیا کہ طیارہ غلطی سے مار گرایا گیا۔ تاہم کریملن نے پہلے کہا تھا کہ طیارہ پرندوں کے ٹکرانے اور خراب موسم کی وجہ سے اپنا راستہ تبدیل کرنے کی وجہ سے گر کر تباہ ہوا تھا۔