سوشل میڈیا پر دوستی: بھارتی نوجوان لڑکی سے ملنے سرحد پار کر گیا

نیوز ٹوڈے :    سوشل میڈیا پر پاکستانی لڑکی کی محبت میں گرفتار بھارتی ریاست اتر پردیش سے تعلق رکھنے والا نوجوان اس سے ملنے سرحد پار کر گیا۔بھارتی میڈیا کے مطابق اتر پردیش کے ضلع علی گڑھ سے تعلق رکھنے والا 30 سالہ بادل بابو غیر قانونی طور پر سرحد عبور کر کے پاکستان میں داخل ہوا جسے پاکستانی حکام نے گرفتار کر لیا۔

رپورٹ کے مطابق پاکستانی حکام لڑکے کی غیر قانونی سرحد عبور کرنے کی تحقیقات کر رہے ہیں تاہم لڑکے کا کہنا ہے کہ اسے ایک پاکستانی لڑکی سے فیس بک پر دوستی کرنے کے بعد اس سے محبت ہو گئی اور وہ اس سے ملنے آیا۔ واضح رہے کہ یہ پہلا موقع نہیں ہے کہ سوشل میڈیا پر محبت میں گرفتار ہو کر کوئی سرحد پار کر گیا ہو یا اپنا ملک چھوڑ کر دوسرے ملک چلا گیا ہو۔

سال 2023 میں سیما حیدر نامی خاتون PUBG گیم پر ایک لڑکے سے دوستی کرنے کے بعد 4 بچوں کے ساتھ نیپال کے راستے بھارت پہنچی جس کے بعد پولیس نے اسے گرفتار کر لیا۔ سال 2023 میں ہی 19 سالہ پاکستانی لڑکی اقرا جیوانی نے 25 سالہ بھارتی شہری ملائم سنگھ یادیو سے آن لائن گیم کے ذریعے دوستی کی، جس کے بعد اقرا جیوانی اور ملائم سنگھ یادیو کی نیپال میں شادی ہوئی۔

گزشتہ سال ایک بھارتی لڑکی انجو اپر دیر میں ایک پاکستانی نوجوان نصراللہ سے دوستی کے بعد پاکستان آئی تھی۔