پاکستان میں دہشت گردی اور ٹارگٹ کلنگ میں بھارت کا گھناؤنا کردار بے نقاب

نیوز ٹوڈے :   تفصیلات کے مطابق دہشت گردی اور سنگین انسانی جرائم میں ملوث بھارت کا کالا چہرہ عالمی سطح پر بے نقاب ہو گیا ہے، عالمی جریدے واشنگٹن پوسٹ نے بھارتی حکومت کی سرپرستی میں ہونے والی دہشت گردی کو بے نقاب کیا ہے۔ واشنگٹن پوسٹ کے مطابق بھارت پاکستان میں دہشت گردی کی کارروائیوں کے ذریعے ٹارگٹ کلنگ میں ملوث ہے، بھارتی ایجنسی ’’را‘‘ نے پاکستان میں کرائے کے قاتلوں اور افغان ہتھیاروں کے ذریعے کم از کم 6 افراد کی ٹارگٹ کلنگ کی۔

امریکی اخبار نے لکھا کہ ’’2 اپریل کو نقاب پوش افراد نے لاہور میں تمبا جس کا اصل نام عامر سرفراز ہے، کو گولی مار کر قتل کر دیا اور فرار ہو گئے‘‘۔ یہ واقعہ بھی دیگر ممالک کی طرح بھارت کی خفیہ قتل و غارت گری کی مہم کا تسلسل ہے۔ بھارتی ایجنسی ’’را‘‘ نے پاکستان میں بہت سے لوگوں کو نشانہ بنایا ہے۔ شواہد سے صاف ظاہر ہوتا ہے کہ پاکستانیوں کے قتل میں بھارت ملوث ہے۔ 2021 کے بعد بھارت کی خفیہ ایجنسی ’’را‘‘ نے پاکستان میں کئی لوگوں کو قتل کرنے کی خفیہ مہم چلائی جس میں کئی پاکستانی شہریوں کو نشانہ بنایا گیا۔

واشنگٹن پوسٹ کے مطابق پاکستان کے وزیر داخلہ نے بھی ان ہلاکتوں میں "بھارت کے براہ راست ملوث ہونے" کا انکشاف کیا ہے۔ 2014 میں، ہندوستان کے قومی سلامتی کے مشیر اجیت ڈوول نے کہا کہ "پاکستان پر حملہ کرنا غیر حقیقی ہے، لیکن ہم اپنے مقاصد کے حصول کے لیے خفیہ ذرائع استعمال کر سکتے ہیں۔"

امریکہ، کینیڈا اور مغربی ممالک میں ’’را‘‘ کی قاتلانہ مہم کی وجہ سے بھارت شدید بین الاقوامی تنقید کی زد میں ہے۔ بھارت نے امریکہ، کینیڈا اور مغربی ممالک میں ماورائے عدالت قتل کیے ہیں۔ بھارتی خفیہ ایجنسی ’’را‘‘ نے کینیڈا اور امریکہ میں سکھ رہنماؤں کو قتل کیا۔ واشنگٹن پوسٹ نے مزید لکھا کہ نئی دہلی میں ’’را‘‘ کے افسر وکاش یادیو نے نیویارک میں ایک سکھ علیحدگی پسند رہنما پر قاتلانہ حملے کی ہدایات جاری کیں۔ ’’را‘‘ کے افسر نے اپنے ایجنٹ کو ہدایت کی کہ وہ اس قتل کے لیے مقامی قاتل کی خدمات حاصل کرے۔ کینیڈین حکام نے بھارتی سفارت کاروں اور ’’را‘‘ کی دہشت گردی کو بھی بے نقاب کیا۔

سفارتی ماہرین کا کہنا ہے کہ گزشتہ برس پاکستانی شہریوں محمد ریاض اور مولانا شاہد لطیف کی ٹارگٹ کلنگ میں بھارت کے ملوث ہونے کے شواہد سامنے آئے ہیں۔ اس سے قبل بھی وزارت خارجہ نے پاکستانی سرزمین پر بھارتی دہشت گردی کو ثبوتوں کے ساتھ بے نقاب کیا تھا۔ دنیا بھارتی جارحیت، دہشت گردی اور عالمی قوانین کی خلاف ورزی کا سخت نوٹس لے۔ بھارتی دہشت گردی، دوسرے ممالک میں مداخلت اور ٹارگٹ کلنگ عالمی امن کے لیے سنگین خطرہ ہیں۔