مسک نے برطانوی عوام کو 'ظالم' سے آزاد کرنے کے بارے میں ایکس صارفین کی رائے طلب کی

نیوز ٹوڈے :   ایلون مسک نے برطانوی عوام کو 'ظالم' سے آزاد کرنے کے بارے میں ایکس صارفین کی رائے طلب کیامریکی ارب پتی اور سوشل میڈیا پلیٹ فارم ایکس کے مالک ایلون مسک نے سوال اٹھایا ہے کہ کیا امریکہ کو برطانوی عوام کو ان کے ’ظلم‘ سے آزاد کرنا چاہیے؟ایکس پول مسک اور برطانوی حکومت کے سینئر عہدیداروں کے درمیان بڑھتی ہوئی تلخی کے بعد سامنے آیا ہے۔

ایلون مسک، جو کہ امریکی نو منتخب صدر ڈونلڈ ٹرمپ کے مشیر بھی ہیں، نے برطانوی حکومت کے بارے میں سخت بیانات دیے ہیں، جس سے فریقین کے درمیان لفظوں کی جنگ چھڑ گئی ہے۔ اپنی سوشل میڈیا پوسٹس میں، ایلون مسک نے برطانیہ کی لیبر حکومت پر شدید تنقید کی تھی، جس میں بچوں کے ساتھ بدسلوکی کے اسکینڈلز سے نمٹنے کو نشانہ بنایا گیا تھا۔

سوشل میڈیا پلیٹ فارم ایکس کے مالک ایلون مسک نے برطانیہ کے سیف گارڈنگ منسٹر جیس فلپ کو عصمت دری اور نسل کشی کے لیے معافی مانگنے والا قرار دیا۔ایلون مسک نے برطانوی وزیراعظم کو بھی تنقید کا نشانہ بناتے ہوئے الزام لگایا کہ وہ گرومنگ گینگز کے خلاف کارروائی کرنے میں ناکام رہے ہیں۔

ان الزامات کے جواب میں، انہوں نے اپنے سوشل میڈیا پلیٹ فارم کے صارفین سے برطانوی عوام کو ’آزاد‘ کرنے کے بارے میں ان کی رائے مانگی۔ایکس پول پر ایلون مسک نے لکھا کہ 'امریکہ کو برطانوی عوام کو ان کی جابرانہ حکومت سے آزاد کرنا چاہیے'۔

ایلون مسک کے ایکس پول پر اب تک 1.3 ملین سے زیادہ لوگ ووٹ ڈال چکے ہیں، جن میں سے اکثریت (58.6 فیصد) نے 'ہاں' جبکہ 41.4 فیصد نے 'نہیں' کہا۔غیر ملکی میڈیا کے مطابق ایلون مسک کے ان بیانات پر برطانیہ میں سیاسی حلقوں اور عوام میں شدید ردعمل سامنے آیا ہے جب کہ کئی ماہرین نے ان تبصروں کو اشتعال انگیز قرار دیا ہے۔