'یوکرین جنگ ختم کریں یا محصولات اور پابندیوں کا سامنا کریں': ٹرمپ کا پوتن کو واضح پیغام

  نیوز ٹوڈے :    امریکی صدر ڈونلڈ ٹرمپ نے اپنے روسی ہم منصب ولادیمیر پیوٹن کو واضح پیغام دیا ہے کہ وہ یوکرین جنگ کے خاتمے کے لیے کوئی معاہدہ کریں یا پھر محصولات اور مزید پابندیوں کا سامنا کریں۔

خبر رساں ادارے اے ایف پی کے مطابق ڈونلڈ ٹرمپ نے اپنے سوشل میڈیا پلیٹ فارم ٹروتھ سوشل پر لکھا کہ اگر ہم نے کوئی معاہدہ نہیں کیا تو میرے پاس روس کی جانب سے امریکا کو فروخت کی جانے والی اشیا پر بھاری ٹیکس، ٹیرف اور پابندیاں عائد کرنے کے سوا کوئی چارہ نہیں ہے۔ 

امریکی صدر نے کہا کہ میں روس کو نقصان نہیں پہنچانا چاہتا اور صدر پیوٹن کے ساتھ ہمیشہ اچھے تعلقات رہے ہیں۔ میں روس، معیشت جو تباہ ہو رہی ہے، اور صدر پوتن پر اس مضحکہ خیز جنگ کو روکنے کے لیے ایک بہت بڑا احسان کروں گا کیونکہ یہ مزید خراب ہونے جا رہی ہے۔ گزشتہ روز وائٹ ہاؤس میں پریس کانفرنس کے دوران ڈونلڈ ٹرمپ نے سخت موقف اختیار کرتے ہوئے کہا کہ لگتا ہے پیوٹن میز پر نہیں آئے تو اضافی پابندیاں لگا دوں گا۔

تاہم امریکی صدر نے یہ بتانے سے انکار کر دیا کہ آیا وہ سابق صدر جو بائیڈن کی یوکرین کو ہتھیار بھیجنے کی پالیسی کو جاری رکھیں گے یا نہیں۔انہوں نے کہا کہ ہم یوکرین کے صدر ولادیمیر زیلنسکی سے بات کر رہے ہیں جب کہ بہت جلد وہ صدر پیوٹن سے رابطہ کرنے والے ہیں۔

یاد رہے کہ ڈونلڈ ٹرمپ نے امریکی صدر کا عہدہ سنبھالتے ہی روس یوکرین جنگ ختم کرنے کا عہد کیا تھا۔ پیر کو حلف برداری کی تقریب میں انہوں نے کہا کہ روسی صدر جنگ بندی معاہدے پر دستخط نہ کر کے روس کو تباہ کر رہے ہیں۔