امریکی رکن کانگریس جو ولسن نے عمران خان کی رہائی کا مطالبہ کردیا

نیوز ٹوڈے :   وفاقی وزیر داخلہ محسن نقوی کی امریکی رکن کانگریس جو ولسن سے ملاقات، ملاقات کے بعد جو ولسن نے پی ٹی آئی کے بانی کی رہائی کے لیے ٹویٹ کی

امریکی رکن کانگریس جو ولسن نے عمران خان کی رہائی کا مطالبہ کردیا۔ تفصیلات کے مطابق وزیر داخلہ محسن نقوی کی امریکا میں حالیہ ملاقاتوں کے بعد دلچسپ صورتحال پیدا ہوگئی ہے۔ وفاقی وزیر داخلہ محسن نقوی نے امریکی کانگریس مین جو ولسن سمیت کچھ امریکی ارکان کانگریس سے ملاقات کی ہے۔

اس ملاقات کے بعد جو ولسن نے پی ٹی آئی کے بانی کی رہائی کے لیے ٹویٹ کیا۔

اس حوالے سے جنوبی ایشیا کے ماہر اور معروف غیر ملکی صحافی مائیکل کوگل مین نے ردعمل کا اظہار کرتے ہوئے کہا کہ امریکی رکن کانگریس جو ولسن کی جانب سے پاکستانی وزیر داخلہ محسن نقوی سے ملاقات کے بعد عمران خان کی رہائی کے لیے کی جانے والی ٹویٹ یقیناً محسن نقوی اور ان کے بڑوں کی بڑی ناکامی ہے۔

دوسری جانب میڈیا رپورٹس کے مطابق وفاقی وزیر داخلہ محسن نقوی نے واشنگٹن میں امریکی رکن کانگریس جو ولسن اور رکن کانگریس راب بریسناہن سے الگ الگ ملاقاتیں کیں، جس میں باہمی دلچسپی کے امور اور پاک امریکا تعلقات کے فروغ پر تبادلہ خیال کیا گیا۔ ان اہم ملاقاتوں میں خطے میں دیرپا امن کے قیام بالخصوص افغانستان کی صورتحال پر بھی تبادلہ خیال کیا گیا۔

ملاقاتوں میں پاک امریکہ تعلقات کو مزید فروغ دینے کے عزم کا اظہار کرتے ہوئے دونوں ممالک کے درمیان تجارتی اور ثقافتی وفود کے باہمی تبادلوں کو بڑھانے کی ضرورت پر زور دیا گیا۔ وزیر داخلہ محسن نقوی نے پاک امریکا تعلقات کے فروغ کے لیے ہر سطح پر مکمل تعاون کی یقین دہانی کرائی۔ وفاقی وزیر داخلہ محسن نقوی نے کانگریس مین جو ولسن اور کانگریس مین راب بریسنہن کو دورہ پاکستان کی دعوت دی۔

انہوں نے کہا کہ امریکہ پاکستان کا انتہائی اہم سٹریٹجک پارٹنر ہے، پاک امریکہ تعلقات کئی دہائیوں پر محیط ہیں۔ وزیر داخلہ محسن نقوی نے مزید کہا کہ صدر ڈونلڈ ٹرمپ کا خطاب یقیناً عالمی امن اور تنازعات کے حل کے لیے بہت حوصلہ افزا ہے، صدر ڈونلڈ ٹرمپ دنیا کے لیے امن کی نوید بن چکے ہیں۔ وزیر داخلہ محسن نقوی نے امید ظاہر کی کہ صدر ڈونلڈ ٹرمپ کے دور میں پاک امریکا تعلقات نئی جہت حاصل کریں گے۔ ملاقاتوں میں پاکستان اور امریکا کے درمیان مختلف شعبوں میں بڑھتے ہوئے تعاون پر تبادلہ خیال کیا گیا اور سمندر پار پاکستانیوں کے مسائل کے حل کے لیے اقدامات پر بھی تبادلہ خیال کیا گیا۔ اس موقع پر امریکا میں پاکستان کے سفیر رضوان سعید شیخ بھی موجود تھے۔