امریکا نے پاکستان کی امداد بھی روک دی، کئی اہم منصوبے روک دیے

نیوز ٹوڈے :   دنیا کے کئی ممالک کی طرح امریکی حکام نے بھی پاکستان کی امداد کی معطلی اور کئی اہم منصوبوں کو روکنے کی تصدیق کی ہے۔گزشتہ دنوں امریکا نے یوکرین، تائیوان اور اردن کے لیے امدادی پروگراموں سمیت تقریباً تمام غیر ملکی امدادی پروگرام عارضی طور پر معطل کر دیے تھے جب کہ ابتدائی طور پر یہ امدادی پروگرام 90 دنوں کے لیے معطل کیے گئے تھے۔

اسٹیٹ ڈپارٹمنٹ کی جانب سے تمام امریکی سفارتی اور قونصلر مشنز کو ایک حکم جاری کیا گیا تھا، جس میں ان سے کہا گیا تھا کہ وہ تمام امدادی پروگرام فوری طور پر معطل کر دیں اور اس سلسلے میں تمام کام بند کر دیں۔

تاہم اب امریکی حکام نے دیگر ممالک کی طرح پاکستان کے لیے بھی امریکی امداد کی معطلی کی تصدیق کر دی ہے جس کے بعد کئی اہم منصوبے روک دیے گئے تھے۔

ایک امریکی اہلکار کے مطابق پاکستان کی امداد دوبارہ جائزے تک روک دی گئی ہے۔ سفیروں کے فنڈ برائے ثقافتی تحفظ کے تحت کام عارضی طور پر روک دیا گیا ہے جبکہ توانائی کے شعبے کے 5 منصوبے بھی امریکی کارروائی کے باعث روک دیے گئے ہیں۔

امریکی اقدام سے اقتصادی ترقی سے متعلق 4 اور زراعت کے شعبے سے متعلق 5 پروگرام متاثر ہوئے ہیں، جب کہ جمہوریت، انسانی حقوق اور گورننس سے متعلق فنڈز بھی عارضی طور پر روک دیے گئے ہیں۔

اس کے علاوہ، امریکی اقدام سے گورننس کے 11 پروگرام، تعلیم کے شعبے میں 4 اور صحت کے شعبے میں 4 پروگرام متاثر ہوئے ہیں۔امریکی حکام دوبارہ جائزے کے بعد پروگراموں کو جاری رکھنے کا فیصلہ کریں گے۔